انتشر مساء اليوم الجمعه منشورات الحمله التى تدعو الى جمعه التطهير غدا الموافق 15 ابريل ودعا المنشور لحشد اكبر قدر من الجماهير للتحرك غدا للمطالبه بحل المجلس واقالته بالكامل وجاءت تفاصيل المنشور كالاتى ::
قبل اي حاجه , الورقه اللي في ايدك دي لا تبع عثمانيين ولا غيط ولا هيلتون ولا اي حد ليه ادني مصلحه ولا اي شوق في كرسي , الورقه دي وراها شباب و رجاله بيعشقوا تراب اسماعيليه , البلد اللي لما بنسمع اسمها واحنا متغربين جسمنا بيقشعر و بنحس بالفخر وان راسنا في السما.
دلوقت جه وقت تطهير الجسد الاسمعلاوي من الفساد المتغلغل فيه , الفساد اللي ابتداه الفخراني و كمله مجلس العار ولسه عايشينه . في شهر 7 اللي فات قلنا لأ ووصلنا صوتنا في وقت الكل عارف كان الصوت بيوصل بطلوع الروح و برهبه ازاي.
الموضوع أكبر بكثير من مجرد كوره , الموضوع هو ارادة شعب لتطهير ما تبقي من فساد أورثه النظام السابق لينا و عيشنا فيه وكأنه طبيعي , فساد صبرنا عليه بغرابه 3 مواسم كرويه راضيين بفضائح علي الملأ من كل جهه من حجز علي النادي من 4 جهات مختلفه (ضرائب و كهرباء و ترافكو للسياحه و نادي الشمس) وضياع هيبة النادي الافريقيه بأول هزيمه علي أرضك من الشبيبه وثاني اكبر هزيمه في تاريخك من فريق غير مصنف ومبالغ بتوصل ل 35 مليون في السنه بتتصرف بدون بطوله ولمدة 3 سنين ولاعيبه وموظفين مبيقبضوش وقطاع ناشئين مات والاشبال مش لاقيه تاكل وفضائح علي الهوا بين اعضاء المجلس المفكك وفلوس محدش عارف هي رايحه فين و جايه منين واكاديميات محدش عارف هي تبع ايه ولا مين مستفيد من وراها ومحافظه بتدفع للنادي من قوت الشباب اللي مش لاقي شغل والفلوس بتسيح بعدها بيومين ونرجع بعدها من تاني للشحاته والاستجداء علي الهواء من محافظ فاشل و مجلس معدوم الكرامه وغيرها وغيرها من الفضائح و التجاوزات في حقك كمواطن اسمعلاوي أولا وكمشجع ثانيا لو هنتكلم عنها عايزين كشكول.
متقولش كلها سنه وكده كده هيمشوا , أحب اقولك تبقي مليون غلطان , الرئيس المبجل حول الـ5 الاف عضويه قبل مجلسه لـ18 الف عضويه النهارده , يعني الرجل عمل عضويات للرجاله بتاعته في فترة رئاسته 3 أضعاف عدد العضويات اللي اتعملت من سنه 1924, يعني لو دخل انتخابات تاني , ممكن جدا ينجح , لأن الجمعيه العموميه مش هتعبر عن رأينا , لكنها هتعبر عن الفساد اللي عشناه ال 3 سنين دول.
مينضحكش عليك لو -ان شاء الله- فوزنا علي بتروجيت يوم الأربعاء وتقول ما هي الدنيا ماشيه , احنا طموحنا أكبر من كده , طموحنا اننا نبقي رقم 1 بما ان ظروف البلد الجديده تسمحلنا بمنافسه شريفه مشفناهاش من يوم ما الدوري اتعمل , طموحنا نشيل الفساد ونجيب رجل مننا , قلبه علي البلد و علي النادي يحس بينا و يخاف علي كل مليم داخل او طالع كأنه ماله الشخصي.
ميعادنا يوم الجمعه 15 ابريل , جـمعـة تطهير الاسماعيلي من أبو الحسـن و مجلس العــــار , بعد الصلاة في حديقة الممر في مظاهره سلميه راقيه , فرصتنا اننا نشيل رمز فساد كتم علي نفسنا 3 سنين بغير ارادتنا بحجة الشرعيه الفاسده التي بطلت برفض الجمهور لها وبفشلها في تنفيذ ولو بند واحد من برامجها الانتخابيه , متجيش وايدك فاضيه , هات اللي تقدر عليه من اصحابك معاك , ولافتتك اللي بتعبر عن اللي جواك , هنكون هناك بنكتب التاريخ ان شاء الله , متفوتش فرصة كتابته معانا.
