العديد من المشاكل والازمات اثيرت مؤخرا داخل قلعه الدراويش فاتجه موقع elismaily.com للمستشار وليد الكيلانى عضو مجلس الاداره لمعرفه رأيه فى تلك الازمات وكان لنا الحوار الاتى معه
ما ردك على الجماهير التى تطالب المجلس بالاستقاله؟؟؟؟؟
اغلبيه الجماهير الى بتطالب المجلس بالاستقاله هم جماهير لا يقدرون المسؤليه الملقاه علينا
ولا بيقدروا حجم المتاعب الى احنا بنتعبها من ناحيه توفير موارد ومن ناحيه تعاقد مع لاعبيين تليق باسم النادى الاسماعيلى ومن ناحيه مجهود جبار من اجل توفير موارد ثابته نقدر نصرف منها على النادى
ما ردك على كميه الاستقالات الى اتقدمت من خلال مجلسكم؟
والله الاستقالات دى مش معناها اننا غلط وهما صح والدليل على كدا اننا مفيش اى خصومات مابيننا
يعنى لو كنا احنا غلط كانوا هيطلعوا يقولوا احنا استقالنا علشان فى اخطاء من المجلس
لكن الاستقالات دى كلها تمت تحت ظروف مختلفه زى مثلا عدم تحمل ثوره الجماهير وايضا لظروف عمل بمكان اخر وايضا لاختلاف الاراء
واكيد احنا مجلس كامل ويجب علينا كلنا احترام اراء بعض والانتظار حتى ناخد رد معين
بالنسبه لإختبار عدد كبير من اللاعبين الأجانب والنتيجه النهائيه عدم التعاقد مع أى منهم ؟؟
والله دى رؤيه المدير الفنى يعنى احنا بنوفر اللاعيبه الاجانب وخاصه ان مرتباتهم بتبقى اقل من مرتبات المصريين
فبنجيب اللاعيبه وتخضع للاختبار وفى الاول وفى الاخر الى بيحسم الامر هو المدير الفنى واحنا منقدرش نرغم المدير الفنى على انه يلاعب لاعب هو مش عايزة علشان احنا جبناه يختبر
هل ترى ان الاسماعيلى يسير بخطى ثابته؟؟؟؟؟؟؟؟؟؟
احنا بقالنا موسميين ماسكيين النادى
واول موسم جبنا تانى الدورى بمباراه فاصله وتانى موسم دعمنا الفريق بصفقات كبيره ولكن ظروف الاصابات هى الى دهورت الاداء ورغم الاصابات وتدهور الاداء الا اننا احرزنا المركز التالت فى الدورى والمربع الذهبى فى الكاس ودور التمانيه فى دورى الابطال
يعنى نتايج منطقيه بالنسبه لينا وكلها نتايج ايجابيه وفى الموسم الحالى الدير الفنى طلب مهاجميين وفرنا عدد كبير من المهاجميين المتميزين ورفضنا بيع المعتصم سالم نظرا لحاجتنا ليه
وكلمه كمان عايز اقولها ان مفيش اى خلافات او انقسامات حصلت بيننا فى المجلس بالنسبه لبيع المعتصم سالم
لاننا كلنا متفاهميين وكلنا اخذنا قرار الابقاء على المعتصم سالم نظرا لحاجتنا إليه
بالنسبه للضائقه لماليه التى يمر بها النادى الاسماعيلى وانه فى حاجه لعشرة مليون على الاقل خلال الفترة القادمه , هل تستطيعون تدبير هذا المبلغ ؟؟
وفى حالة عدم تدبيره هل ستتقدموا بالاستقاله؟؟؟؟؟؟
بالنسبه للضائقه الماليه الى بنمر بيها فهى ضائقه مزمنه
يعنى هى مستمرة مع النادى الاسماعيلى نظرا لقله الموارد يعنى فى كل السنين الى فاتت فى نفس الوقت دة بيبقى فى ضائقه
فانا مش شايفها حاجة جديده
وباذن الله احنا بدأنا ندفع مقدمات عقول للاعيبه وخاصه الوافدين الجدد وفى انتظار فلوس البث وفلوس شركه الدعايه وايضا احنا كمجلس اداره النادى الاسماعيلى هنقدم العون للنادى ونتبرع للنادى الاسماعيلى باللى نقدر عليه وان شاء الله الازمه شبه انتهت خلاص
اما بالنسبه للاستقاله الجماعيه فانا بقولها على مسؤليتى الشخصيه
لو فى حد تقدم بالتبرع للنادى الاسماعيلى بمبلغ 10 مليون جنيه كلنا هنقدم استقالتنااا
للتعليق والمزيد
